من يوم قرصة الأذن لي عملها المدير الجيعان ما عاد يغيب على الدوام… حاضر في كل وقت وحين يتجنب الملام… يمشي على الكاتالوغ مايخاف السيستام… حاضر سيدي واش يخصك اهلا وسهلا تفضلي مادام تفضلي مادام… المهم تسقمت حوالو وطار التفنيين تاع ذوك الايام… في حين ظل الصايم في عون اخوه في حقول الشمام… الخير السنة من كل لون ما علينا تخمام… البلاد تنتج وراها بألف خير وراح نمشيو بالاقتصاد للقدام… الفلاحة اهم اعمدة الاقتصاد الوطني وحالها تمام التمام….لما تكثر السلعة في السوق راح ينزل السعر ونتمسكو بالزمام… ويقدر الزوالي ياكل كل شي بلا تحرام… هذا واش يقول الفلاح لما يزرع ارضو ويحصدا بالأحلام…. في حين تعمل الايدي الخفية على خلق ازدحام…وفوضى كبيرة يتسببو فيها اولاد لحرام.. من صانعي مضاربة بالسوق الى مروجين للفتنة بين المواطن والتاجر ويكثر اللوام… الصاييم وخلال حديثو مع خوه عرف انو السوق تحت سيطرة الاشاعة والكلام… ناس تستوكي وناس تنشر اخبار تغالطة وطير كيف الحمام… وفي الاخير الضحية المواطن البسيط لي جيبو ممزق من كثرة الاوهام… عايش يركض وراء القدرة الشرائية حياتو تقلبت الى ظلام…والدليل المواد لي نصدروها على المواطن نحرموها بتفخيم السوام… ما يقدر ليها يدنى يشوفها ما يتهنى تصير ليه مثل الاحلام… لازم نتعلمو كيفاش نفرضو سيطرتنا على السوق بالمقاطعة حتى نتمسكو بالزمام… نرفضو الشي الكمايلي ونركزو على الهام ..وما نخلو افكارهم تخلعنا لي ما كليناهش اليوم غدوة يجينا بلا تخمام..
………………..يتبع……………….
نوارة بوبير
